بعد ما شفت موضوع منزلو أحد الأخوة والردود, تبين
إنو في شباب لسه مو عرفانة الطريق لتعديل الشهادة الصناعية بألمانيا خاصة الكهربا والميكانيك,
وعلى بركة الله نبدأ :
.
في البداية الكلام ممكن يختلف اختلاف بسيط حسب المقاطعة
والمكان ولكن الطريقة العامة وحدة وهي كالتالي:
.
أول شي لازم يكون معك نسخة عن شهادتك مترجمة للغة
الالمانية ومصدقة من العدل والخارجية السورية مع كشف العلامات وتوصيف المواد ( وإذا
قدرت تصدقها من شي سفارة أو قنصلية المانية بالمنطقة هنيك بكون أفضل - بس هاد مو شرط)
.
تاني شي , بتروح عالجوب سنتر عند موظفك المسؤول
إذا كنت لسه ما عم تشتغل, وبتقلو بدي أعدل شهادتي وأبعتها على IHK مشان يصير عندو خبر ولازم تاخد منو الموافقة
على دفع تكاليف التعديل, وبس قلك أوك مافي مشكلة بتروح عالخطوة التالتة.
.
تالتاً : بتفتح النت ع غوغل وبتكتب iq netzwerk anerkennung وبتدور على هدول الجماعة بمنطقتك, وهدول غالباً بكون في إلهم مكتب في
مبنى Agentur Für Arbeit وكالة العمل يعني , بتروح لعندهم أو بتتصل فيهم لتحديد موعد مقابلة وبتاخد
معك الشهادة وكشف العلامات وتوصيف المواد وكل شهاداتك وشو معك خبرات بتثبت خبرتك وبتدعمك
في مجال دراستك (وإذا عندك شهادات من أماكن أو شركات اشتغلت فيها سابقاً بسورية أو
صور أثناء عملك بشي مصنع أو شركة أو انت عم تصلح آلة الخ, بكون كتير منيح) وشو معك
شهادات تانية والسيرة الذاتية وشهادة لغة المانية يلي وصلتلها وكل هالقصص وبتروح ,
هدول الجماعة باختصار وظيفتهم تقييم شهادتك وخبراتك وتحديد بالضبط شو بتعادل شهادتك
الصناعية في المانيا تحت أي مجال وأي مسمى. بس تخلص المقابلة بتوقع على أوراق إنو إنت
عملت مقابلة و بيعطوك ورقة محدد عليها اسم اختصاصك بالالماني مع كم ورقة لازم تعبيهم
وبعدها الخطوة الرابعة.
.
رابع شي : بتاخد شهادتك وبتروح عالبلدية Rathaus بمنطقتك بتصدق نسخة شهادتك من البلدية beglaubigung بتدفع 3 يورو ع كل نسخة أو حسب ما يطلبو
, وبعدين بترفق معها الشهادات اللازمة و الإثباتات يلي جمعتها و بتبعتها على مركز IHK ويفضل تبعتها على مركزهم الرئيسي في مدينة
نورنبيرغ Nürnberg في مقاطعة بايرن, بعد اسبوع أو أقل رح يبعتولك بريد مشان دفع تكاليف التعديل,
بتاخد الورقة للجوب سنتر عند موظفك المسؤول مشان الدفع . وبعدها بتنتظر مدة بين 3 و
6 شهور أو أكتر حسب الضغط وبإمكانك كل فترة تتواصل معهم عبر الإيميل أو الإتصال حتى
تتابع وتطمن إذا أمورك ماشية أو لأ .
.
في نهاية المطاف رح يجيك تعديل الشهادة معادل لأوسبيلدونغ
كامل Gleichwertig أو بشكل جزئي teilweise gleichwertig وهاد الشي بيعتمد على تقييمهم وحسب الشهادات والخبرات والإثباتات يلي
انت مقدملهم ياها .
.
وان شاء الله يكون الموضوع فيه فائدة للكل .
.
تحياتي وبالتوفيق إن شاء الله
ليست هناك تعليقات:
إرسال تعليق